بحالي شي تجربة
زدت جرعة من السكات بالتخبية
و رسمت ليا ملامح اخرى م تشبهنيش
باش يلا تلاقيتني
م نعرفنيش
ويمكن كاع تغرقني الدهشة
و م يبقاش ليا لوقت باش نسول
واش أنا..
أنت
بحال شي تجربة
خربت الذاكرة
و خليت لون واحد كخلفية
باش م نتفكرش
صورة وحدة معلقة ف حيط رايب
يد و عصا بلا غنم
انا الوحيد لي كنت
انا الوحيد لي كاين
قبل
كنت كلمة سبقات الزمن
وكنت..
من بعد
سبقت الطين بسؤال مفتوح على شك معلق ف عنقي
عاد بنت
بحال شي تجربة
توهمت بلي عايش اول غوتة من اختياري
أول تعنيقة للحياة
أول قبلة غرقاتني ف يم لمحبة
شوفتي وحدة
ضحكتي وحدة
باقي تالف باش نختار ليا إسم
ويمكن م نختاروش
باش نفصل وطن على قد الأمل لي ف عيني
ويمكن م نشوفوش
باش نوجه خطواتي فين بغيت
و يمكن انا وياها م نرجعوش
م نصدقوش
بحال شي تجربة