إلى روح فقيد الوطن الكبير

خاصْ من بْحالك بزافْ
خاصْ من بْحالك شْلَّة
باش المشهد يْنْظافْ
من لْمْكَرْ وْلْعْلَّة
خاص من بحالك بزافْ
ما يْطيحْ
ما يْتدلى
ما يصير وْزْنُو يْخْفافْ
عْشّْ رْتيلة فْ سْلَّة

خاص من بحالك بزافْ
عْلى خُبزْ الناس يْخافْ
عْلى فرْحُهم راه يخافْ
إلى يْتْسْرْق فْ غفلة
وْيخاف عْلْ لْمَركب
يْخاف عليه يْتْعْطَبْ
وْيْباتْ مْجْرّْدْ قْذافْ
وافي عَهد ما يْتخلَّى
وْيخافْ لْوْطان يْتْبْلى
بْقْوامْ باخْسين قْصافْ
بْعيدْ صْدْقهم والعفافْ
بايعين الحْلْمة جْمْلة
ما صادقو هُوما لْوْطان
ما صادقو هُوما قَسَمْ
ما صادقو هوما السلطان
بْغاوْها بْعْدْ لْعْمارة
تْخْلا
أَومّا نْتا
كْنْتِ بزاف
شْحال نْعْدّْ فيكْ مْن وْصافْ
نجي نْعدّْ نْلقاها بزافْ
خاصْ من بحالكْ شْلَّة
خاص من بحالك بزاف