ليا زمان حزين
والحزن كبرني صغير
من قبل حتى نعرفه معناه
والفقد علمنتي التباكي
ع الحليب المنسكب
والالم رافقني طفل
وياما لعب بيا
وواجد لعبت معاه
والجوع يكسر خاطري
وكلمة حنونة تجبره
وديمة وانا عندي سؤال
ياهل ترى ..
في هالبلد
نلقي متر في متر
في تراب يحضنني
فأيا مقبرة ؟
لوكنت فعلا صاحبي
احسب معايا بالقلم والمسطرة
شن مكسبي ..
وكم الخسارة ف حسبتي
وكم هو الربح
لو كنت فعلا صاحبي
احسبها معايا صح .
……..
ليا زمان ماقلتش قصيدة تقولني
وليا زمان
نبرم على الكلمات
والحروف تبرم حولني
وليا زمان نكتب علي انسان
لا شايفه لا نعرفه
والشعر يبي معرفة
والمعرفة تبي اجابة
عن عديد الاسئلة
لو كنت فعلا صاحبي
ابحث معايا
عن حلول للمسألة
مسروق من عمري .. عمر
وضيعت من يدي اطناشن فرح
ومرة وانا ف حالة فلاس
بعت ميتين ضحكة لعابرين سبيل
ومابعت حتى جرح
وسددت عن صاحب حبيب وطيب
حفنة دموع وحزن
وحق الرفق والملح
شن مكسبي ..
وكم الخسارة ف حسبتي
وكم هو الربح
لو كنت فعلا صاحبي
احسبها معايا صح .
…..
ليا زمان
هارب انا مني
ومش عارف نعيش
وكل ما وقفت الصبح قدام المراية
نلقى وجه يخزرلي
ومايشبهنيش
كيف نقدر نرتب محتواي
ونعرف شكون ضدي
ومن هو معاي
لو كنت فعلا صاحبي
احسب معايا الجاي
مخطوف من حضني .. حضن
ومدفون في صدري نغم
وعندي حذاء للبيع مش ملبوس
من يوم ما الخطوات ذوبهن .. لغم
وورثت من جدي
رصاصة رحمة
بالك ف لحظة قهر
اتعيني ع الزمن
ومن اجل كسرة عيش
وبابخس ثمن .. بعت الكفن
وعندي ثلاث اصغار
ممكن بيعهم
لوكان يشرولي وطن
شن مكسبي ..
وكم الخسارة ف حسبتي
وكم هو الربح
لو كنت فعلا صاحبي
احسبها معايا صح .
اترك تعليقاً