جبل
ف قلبي جبل حاير بين السر ورمادو.
غزالة ترعى فيه. وترضّع احجارو.
شمس باردة تتدّفّا بتاريخ النار.
يتهرس الليل اطراف اطراف، ف قلبي.
ويهدي سرو للرمان. ف قلبي جنان. مات اللي يسقيه.
قلبي. غزالة ترعى فيه.
احجار ترضَع العطش. وتبوس الليل ف عين اللّي يرويه
بحر
حوت طاير جناوحو رموشك. نمشي ف فكرة الرمان حتى تغرق الجنّة
. نهبل انا والفكرة. ناكلو عقلنا يلا جعنا. عطشنا بحر يشرب البحر
خشب
غابة هاربة من ظلها. ظلام يتنفّس دمع الشجرة الجامد.
السما تسقي شجرة الرمان. وتطفي روح اللي بقى
. يا السما .. يا روحي الزرقا
عسل
حبل مفتون. عقل مفتول. صوت هارب من روضة حية لسوق ميت.
كتاب مفتون. عقل مفتوح
. يد اوحات ليها الريح تفتح
باب عاسّ على الجّبح
غراب
خاوة عرجا. موت شعرها شوك. شحال يا العشق من قربان!
شحال باش ضوك يبان!
خاوة تمشي على راسها. وتجر من وراها سلاسل وقبور. ف قلبي غراب يغنّي. وسما تاكل الطيور
حبق
صباح يجري بين الحجر. شموس تشهق ف عين الكلمة- العالم. ليل صايم. شموس تشهق.
صباح يحلم بيه الحبق.
شوق
بغيت نقول ماتبقايش تغيبي ذبحاتني وهي خارجة. خليت الدم يهدر. يمكن عليها كلامي احمر
. «يوم ملقاك يوم فرحي وهنايَ»
غنا الطير الحر غنايَ. عطشت، حتى عطش العطش فيّ. ومت حتى ولّيت روضة ليلها نواح ونهارها نواح. وقتاش الطير الحر اللي ف قلبي يلقى سماه، يلقاك، ويرتاح.
حال
تهرق شوقك على الطريق مشيت على شفايفي. حال يلوحني لحال.
الوقت يبس فاش شفتك. عروقي دالية. دمي سكّر كلامك. نتي تقولي هاذي شجرة وانا نسمعها توحشتك. من حال لحال . تقولي الجو زوين وانا نسمعها مرحبا بيك فيَّ. بدمي نسقيك. يا شجرة المحال.
اترك تعليقاً